भिंती

भिंती

बांगड्या फुटतील तेव्हा एकट्या होतील भिंती
माणसे मग मौन धरतिल पोरक्या होतील भिंती

कोरडा हा गाव येथे मोगराही लाल असतो
बघ जरा हासून तूही बोलक्या होतील भिंती

रंग रक्ताचा सदा आरक्त असतो सत्य आहे
हात पसरुन साद दे मग मोकळ्या होतील भिंती

देव असतो आणि नसतो, माणसे असतील सोबत
तू जरा माणूस हो मग सोयऱ्या होतील भिंती

खोल दरवाजे मनाचे अंतरीच्या शोध सत्या
विरघळावे द्वैत सारे दार त्या होतील भिंती

© विशाल कुलकर्णी