पुन्हा एकदा ...

आता नकोच ते उसासे टाकणं,
जुनं आठवून उगाचच चरफडणं !

 

बेकरीच्या कळकट बरणीतल्या,
ओशटलेल्या केकसारखं बुरसटणं !

 

नको ते सदोदीत स्वप्नात रमणं,
स्वत:वरच ते पुन्हा पुन्हा वैतागणं !

 

आता करावं म्हणतो सुरू पुन्हा,
रोज नव्याने नवे नवे रस्ते बांधणं !

 

प्रत्येक वळणावर एखादा नवा,
जुन्यालाही छेदणारा प्रश्न उभारणं !

 

नकोत उगाळायला चुका जुन्या,
विसरेन म्हणतो रडगाणी उगाळणं !

 

आता नव्या हुरूपानं गुंते करणं,
जुन्याच समस्या नव्याने शोधणं !

 

कदाचीत या आगळ्या कैफातच,
पुन्हा प्रवाही होईल माझं जगणं !

 

विशाल