लोटांगण

गुरूर ब्रह्मा, गुरूर विष्णू
गुरूर देवो सत्यसाईश्वरा
धावत आलो दिल्लीवरूनी
सरकारा तारा पट्टपुर्थीश्वरा ….

विजय जाहला, सत्ता आली
’खाती’ खाती हवी आम्हाला
घास मुखीचा निसटू पाहे
कृपा असावी पट्टपुर्थीश्वरा …

महान राष्ट्री भाऊबंदकी
लोणी हवे सारे आम्हाला
सावलीनेच धरला दावा
द्या वरदहस्त पट्टपुर्थीश्वरा …

पोहोच तुमची खालवर पुरती
हायकमांडही ढाळीते चवर्‍या
उद्दंड जाहला जाणता राजा
द्या समज त्यासी पट्टपुर्थीश्वरा …

नतमस्तक हो तुमच्यापुढती
दास खुर्चीचे पामर आम्ही
बुडत्या नौकेस हात द्यावा
घ्या दंडवत माझा पट्टपुर्थीश्वरा …

संदर्भ : महाराष्ट्राच्या मुख्यमंत्र्यांनी दिल्लीवरुन धावत येवुन सत्यसाईबाबांची केलेली पाद्यपुजा.

विशाल.