गझल

लांब त्या रस्त्यावरी बघ थांबले आयुष्य आहे
कोण जाणे का तुला हे भावले आयुष्य आहे

वाट मी ही पाहिलेली अंतसमयाची सुखाने
कोणत्या त्या कारणास्तव लांबले आयुष्य आहे

मांडला बाजार कोणी कोंडलेल्या भावनांचा
कैक दुखऱ्या आठवांनी तुंबले आयुष्य आहे

उधळुनी देतोच आहे प्राक्तनाची बंधने मी
पण रुढींच्या चौकटीवर टांगले आयुष्य आहे

व्यर्थ अट्टाहास वेड्या मरण वेळा टाळण्याचा
स्वप्नओल्या पापण्यांना झोंबले आयुष्य आहे

© विशाल कुलकर्णी