आगमन आनंदाचे

 

जलद काळे नीळेसावळे 

झाडे वेली निर्झर ओले

ओलेती नक्षी गुलबक्षी

क्षितिजावरती रंग पसरले

वाट पाहते धरा सावळी 

अधोवदन ती सखी बावरी

दंवबिंदूचे गंध कपाळी

ल्याली हिरवा साज लाजरी

रंगबावरी वसुधा पाहून

क्षणात हळवे नभ ओघळले

गवतफुलांची गाली लाली

मृदगंधाचे झरे उसळले

मी ती पाऊसवेडी नदी

मी श्रावणातला निर्झर तो

अंगोपांगी ओज सुखाचे

दुःखाचे अस्तित्व विसरतो

तो येता रंगाची उधळण

शेले हळव्या हिरवाईचे

सुखलोलुप मग होते काया

आगमन ओले आनंदाचे

© विशाल कुलकर्णी