पावसाळा

 पावसाळा

शोधतो आहे कधीचा आतला मी पावसाळा

शोधताना मग स्वतःला मीच होतो पावसाळा

मी उन्हाची साथ नाही आजही बघ सोडलेली 

कोणत्या वळणावरी मज भेटलेला पावसाळा?

दिवस सरतो, रात्र होते, स्वप्न ओले जीव पाहे 

मात्र त्या डोळ्यात का हो, थांबलेला पावसाळा?

  

विरघळावे मळभ सारे दंभ सगळा ओघळावा

स्पर्शतो गात्रांस साऱ्या आर्जवी मग पावसाळा

वृक्षगर्भी तेज हिरवे सोनपिवळा वर्ख ल्याले 

झिरपला आनंद बनुनी लाघवी बघ पावसाळा

© विशाल कुलकर्णी