दाटला डोळ्यांत आहे पावसाळा नेहमी

सीट चौथी कां असे नशिबात माझ्या नेहमी
संयमाचा मंत्र कुठवर मी जपावा नेहमी

बायकोला उंबऱ्याची रोज महती सांगतो
साम्य समतेचे धडे देतो जगाला नेहमी

आरश्याला सांग आता सत्य तू बोलू नको
हर चुकीचा यंत्रणेला दोष द्यावा नेहमी

मेघ आले वा न आले, सोड चिंता फालतू
दाटला डोळ्यांत आहे पावसाळा नेहमी

बघ तुला जमलेच तर घ्यावी गज़ल मांडीवरी
अन्यथा मग जोजवावे काफियाला नेहमी

© विशाल कुलकर्णी